अहमदनगर ब्रेकिंग : साखर कारखान्यातील इथेनॉल प्रकल्पाला मोठी आग, मोठ्या स्फोटांमुळे परिसरात घबराट
शेवगाव तालुक्यातील नजीक बाभुळगाव येथील गंगामाई साखर कारखान्यातील इथेनॉल प्रकल्पाला आज सायंकाळी सातच्या सुमारास मोठी आग लागली.
अहमदनगरमधील बाबुळगाव येथील गंगामाई साखर कारखान्याला भीषण आग लागली आहे.अहमदनगर जिल्ह्यातील शेवगाव तालुक्यातील सीमा हद्दीपासून जवळच असलेल्या बाबुळगाव येथील गंगामाई साखर कारखान्याच्या डीसलरी विभागात मोठा स्फोट झाला आहे.
गंगामाई साखर कारखान्यात नेहमीप्रमाणे डीसलरी विभागात कामगार काम करीत असताना अचानक स्फोट झाला. ही घटना शनिवारी सायंकाळी घडली असून दर पाच मिनिटाला स्फोट होत आहेत.अग्निशमन दलाच्या जवानांकडून घटनास्थळी बचाव कार्य सुरू आहे.
काही वेळातच आगीने रौद्ररूप धारण केल्याने आग अटोक्यात आणण्याचे प्रयत्न अपुरे पडत आहेत. त्यासाठी मोठी यंत्रणा राबविण्यात येत आहे. कामगारांना सुरक्षित स्थळी हलविण्यात आल्याचा दावा केला जात असला तरी आगीमुळे जवळ जाता येत नसल्याने नेमकी परिस्थिती अद्याप स्पष्ट झालेली नाही
नुकत्याच हाती आलेल्या वृत्तानुसार आगीची तीव्रता मोठी असल्याने खबरदारी घेण्यात येत आहे. या आगीत किती नुकसान झाले याबाबत अद्याप कोणतीही माहिती समोर आली नाही. सध्या आग आटोक्यात आणण्यासाठी कारखाना प्रशासन मोठी कसरत करत असून सर्वांना सुरक्षितस्थळी हलवण्यात आले आहे.
शेवगाव तालुक्यात हा खासगी साखर कारखाना आहे. तेथे इथेनॉल प्रकल्पही चालविला जातो. त्या प्रकल्पातच आज सायंकाळी ही आग लागली आहे. आगीची माहिती मिळताच नगर जिल्ह्यासह शेजारील छत्रपती संभाजीनगर जिल्ह्यातूनही आग्निशामक पथकाला पाचारण करण्यात आले आहे.
आगीत किती नुकसान झाले, मनुष्यहानी झाली का? याची माहिती अद्याप उपलब्ध झाली नाही. आग लागली तेव्हा कामगार कामावर होते. आगीनंतर मोठे स्फोट झाल्याचे ग्रामस्थ सांगत आहे. आगीच्या ज्वाळा कित्येक किलोमीटरवून दिसत आहेत.
आगीच्या ज्वाळांचे उग्ररुप इतके भयानक होते की, आगीचे लोळ आसपासच्या पाच ते सहा किलोमीटर अंतरावरील गावामध्ये दिसून येत आहेत. या घटनेत दोन जण किरकोळ जखमी झाल्याचे कळते आहे. आगीचे निश्चित कारण, कारखान्यात किती कर्मचारी अडकले आहेत, तसेच जखमी व वित्तहानी बाबत अधिकृत माहिती मिळू शकली नाही.
दरम्यान आगीची माहिती मिळताच आसपासच्या तालुक्यातील साखर कारखाने, विविध संस्थांचे अग्निशमन दलाचे पथक बंबासह घटनास्थळी दाखल झाले आहेत.
तर दुसरीकडे ग्रामीण रुग्णालयातील आरोग्य यंत्रणा सतर्क झाली असून विविध भागातील रुग्णवाहिनीकांना पाचारण करण्यात आले असून सर्व कर्मचाऱ्यांना सतर्क राहण्याच्या सूचना वैद्यकिय अधिकारी डॉ. रामेश्वर काटे यांनी दिल्या आहे.
पोलीस निरीक्षक विलास पुजारी हे अधिकारी व कर्मचाऱ्यांसह घटनास्थळी दाखल झाले आहेत. आगीचे वाढते प्रमाण, दरम्यान टाक्यांचे होणारे स्फोट लक्षात घेऊन, पोलिसांनी कारखाना स्थळाच्या परिसरातील आसपासच्या तीन ते चार किलोमीटर अंतरातील गावातील लोकांना सुरक्षित स्थळी जाण्याच्या सूचना केल्या आहेत.
बघ्यांची मोठी गर्दी झाल्याने काही रस्त्यावर वाहतूक कोंडी झाली होती. सुमारे आठ ते दहा अग्निशमन दलाच्या पथकाकडून यासाठी मोठे शर्तीचे प्रयत्न सुरू आहेत.
