अहमदनगर ब्रेकींग; एसपी कार्यालयातच युवकाने केले विषारी औषधाचे सेवन

अहमदनगर- जिल्हा पोलीस अधीक्षक कार्यालयाच्या आवारात युवकाने विषारी औषध घेऊन आत्महत्या करण्याचा प्रयत्न केल्याची घटना आज (शुक्रवारी) सायंकाळी घडल्याने एकच खळबळ उडाली आहे. दिगंबर शिंदे (वय 21, रा. शेवगाव) असे त्या युवकाचे नाव आहे. त्याच्यावर सिव्हिल हॉस्पिटलमध्ये उपचार सुरू आहेत.

शिंदे याला एका कुटुंबियांकडून त्रास होत होता. त्याबाबत त्यांनी पोलीस अधिक्षक कार्यालयास त्यांच्यावर कारवाई करण्यासंदर्भात 14 ऑक्टोबर 2022 रोजी लेखी तक्रार देऊन कारवाई करण्याची मागणी केली होती. मात्र त्यांच्यावर शेवगाव पोलिसांकडून कुठलीच कारवाई झाली नाही. त्यामुळे आज शुक्रवारी दुपारी दिगंबर शिंदे या युवकाने पोलीस अधीक्षक कार्यालयाच्या आवारात विषारी औषध घेऊन आत्महत्येचा प्रयत्न केला. परंतु हा प्रकार लक्षात येताच तेथील पोलिसांनी तात्काळ त्याला उपचारासाठी सिव्हिल हॉस्पिटलला हलविले. अधिक कार्यवाही सुरू आहे.