अहमदनगर ब्रेकींग: व्यावसायिकावर हत्याराने हल्ला

जुन्या वादातून सावेडीतील व्यावसायिक अमोल भिमराज वरखडकर (वय 46 रा. बालिकाश्रम रोड) यांच्यावर हत्याराने हल्ला केला. या हल्ल्यात वरखडकर हे जखमी झाले आहेत.

सावेडी उपनगरातील बालिकाश्रम रोडवर ही घटना घडली. या प्रकरणी तिघांविरूध्द तोफखाना पोलीस ठाण्यात गुन्हा दाखल करण्यात आला आहे.

प्रसाद बाळासाहेब आटकर, बाळासाहेब नानाजी आटकर, मंगल बाळासाहेब आटकर (तिघे रा. बालिकाश्रम रोड) अशी गुन्हा दाखल झालेल्या आरोपींची नावे आहेत.

जखमी वरखडकर यांनी फिर्याद दिली आहे. फिर्यादी त्यांच्या जय अपार्टमेंटच्या खाली असताना आरोपी तेथे आले. त्यांनी फिर्यादीला जुन्या वादाच्या कारणावरून रागाने पाहून शिवीगाळ करत लाथाबुक्क्यांनी मारहाण केली.

प्रसाद आटकर याने हत्याराने फिर्यादीच्या उजव्या हातावरती मारून जखमी केले. ‘तु परत जर आमच्या नादी लागला तर तुला मारून टाकीन’, अशी धमकी दिली असल्याचे फिर्यादीत म्हटले आहे. पुढील तपास पोलीस नाईक डी. आर. मोरे करीत आहेत.’