भावी पोलिसांच्या डोक्याला लावला गावठी कट्टा; दोन तासात ठोकल्या बेड्या
अहमदनगर- पुणे येथे पोलीस भरतीच्या मैदानी चाचणीसाठी जात असलेल्या दोन तरूणांच्या डोक्याला गावठी कट्टा लावून धाक दाखवून लुटले. दरम्यान लुटणार्‍या त्या दोघांना कोतवाली पोलिसांनी दोन तासात ताब्यात घेत अटक केली आहे.
नगर शहरातील कायनेटीक चौकाकडून माळीवाडा बस स्थानकाकडे येत असताना खालकर हॉस्पिटलसमोर ही घटना घडली. परवेज मेहबुब सय्यद (वय 22 रा. भोसले आखाडा), सोहेल शफीक शेख (वय 18 रा. भांबळगल्ली, भोसले आखाडा) अशी अटक केलेल्या दोघांची नावे आहेत. त्यांच्याकडून एक गावठी कट्टा, चोरीचे एक हजार 200 रूपये हस्तगत करण्यात आले आहे.
या प्रकरणी कृष्णा सुधाकर ठोंबरे (वय 30 रा. दासखेड, ता. पाटोदा, जि. बीड) यांनी फिर्याद दिली आहे. कृष्णा ठोंबरे हे व त्यांचा मित्र मंगळवारी पोलीस भरतीचे मैदानी चाचणी करीता पुणे येथे जाण्याकरीता त्यांचे गावातून ट्रकने नगर शहरातील चांदणी चौकात आले.
तेथे उतरून बुधवारी रात्री एक वाजता माळीवाडा बस स्थानकाकडे जात असताना खालकर हॉस्पिटलसमोर राँग साईडने दुचाकीवर आलेल्या दोघांनी फिर्यादी व त्यांच्या मित्राला गावठी कट्टा दाखवून,‘तुम्ही चुपचाप तुमच्याकडे असलेले पैसे काढून द्या, नाहीतर तुम्हाला गोळी घालीन’, अशी धमकी देवून त्यानी फिर्यादी व त्यांचे मित्राचे खिशातील रोख रक्कम काढून घेतले. याप्रकरणी कोतवाली पोलीस ठाण्यात गुन्हा दाखल करण्यात आला होता.
दरम्यान गुन्ह्याचे गांभीर्य लक्ष्यात घेता पोलीस अधीक्षक राकेश ओला, अपर अधीक्षक प्रशांत खैरे, पोलीस उपअधीक्षक अनिल कातकाडे, पोलीस निरीक्षक संपत शिंदे यांच्या मार्गदर्शनाखाली पोलीस उपनिरीक्षक मनोज कचरे, पोलीस अंमलदार योगेश धोत्रे, योगेश भिंगारदिवे, ए.पी. इनामदार, सुजय हिवाळे, सोमनाथ राऊत, संदीप थोरात, अमोल गाढे, कैलास शिरसाठ यांचे पथकाने लुटारूंचा शोध सुरू केला. तांत्रिक तपास व खबर्‍याकडून मिळालेल्या माहितीनुसार दुचाकीवर रात्री परवेज सय्यद व सोहेल शेख हे फिरत होते.
व ते दौंड रोडने नगर शहराच्या दिशेने टिव्हीएस स्टार सीटी दुचाकी (एमएच 16 झेड 3553) वरून येत आहेत, अशी माहिती निरीक्षक शिंदे यांना मिळाली होती. त्यांनी डिबी पथकाला कारवाईच्या सूचना केल्या. डिबी पथकाने दोघांना शिताफीने ताब्यात घेतले व त्यांची अंगझडती घेतली असता त्यांचे जवळ देशी बनावटीचा एक गावठी कट्टा व चोरीचे एक हजार 200 रूपये मिळून आले. पोलिसांनी ते हस्तगत केले आहे.
