जिल्ह्यातील ६ तहसीलदारांच्या बदल्या, पहा कोणत्या तालुक्याचा पदभार कोणाच्या खांद्यावर
जिल्हा प्रशासनातील उपजिल्हाधिकाऱ्यांच्या बदलीचे आदेश जारी झाल्यानंतर आता तहसीलदारांच्या देखील बदल्यांचे आदेश राज्य शासनाच्या महसूल व वन विभागाच्या वतीने जारी झाले आहेत.
या आदेशात जिल्ह्यातील राहुरी, राहाता, संगमनेर, श्रीरामपूर आणि जिल्हाधिकारी कार्यालयातील सामान्य प्रशासन आणि निवडणूक शाखा तहसीलदारांच्या बदल्यांचा समावेश आहे.
या सहा जागांपैकी तीन ठिकाणी तहसीलदारांच्या नियुक्त्या करण्यात आल्या असून तीन जागी नवनियुक्‍तीची प्रतीक्षा आहे. जिल्हाधिकारी कार्यालयातील सामान्य प्रशासन शाखेच्या तहसीलदार वैशाली आव्हाड यांची बदली नाशिक जिल्हाधिकारी कार्यालयातील कुळ कायदा शाखेच्या तहसीलदार म्हणून करण्यात आली आहे.
त्यांच्या जागी नेमणूक होणे प्रतीक्षेत आहे. तसेच श्रीरामपूर तहसीलदार प्रशांत पाटील यांची बदली चाळीसगाव तहसीलदार म्हणून करण्यात आली आहे. श्रीरामपूर ‘तहसीलदारपदी नवनियुक्‍ती होणे बाकी आहे. राहता तहसीलदार कुंदन हिरे यांची बदली नाशिक विभागीय आयुक्‍त कार्यालयात विशेष कार्यकारी अधिकारी म्हणून करण्यात आली आहे.
हिरे यांच्या जागी राहता तहसीलदार म्हणून अमोल मोरे यांची नेमणूक करण्यात आली आहे. अमोल मोरे हे पूर्वी संगमनेर येथे नायब तहसीलदार होते. प्रमोशननंतर ते धुळे ब नाशिक येथे कार्यरत होते. सध्या चाळीसगाव येथे तहसीलदार म्हणून कार्यरत होते. जिल्हा निवडणूक शाखेत तहसीलदार असलेल्या चंद्रशेखर शितोळे यांची बदली सातारा जिल्हाधिकारी कार्यालयातील सामान्य प्रशासन शाखेचे तहसीलदार म्हणून करण्यात आली आहे.
त्यांचे जागी अंमळनेर तहसीलदार मिलिंदकुमार वाघ यांची नियुक्‍ती करण्यात आली आहे. चंद्रशेखर शितोळे यांनी जिल्हाधिकारी कार्यालयात टंचाई शाखा नायब तहसीलदार म्हणून कार्यरत होते. राहुरी तहसीलदार पदाची कारकीर्द प्रभावीपणे सांभाळलेले एफ.आर.शेख यांचे जागी चंद्रजीत राजपूत यांची नेमणूक करण्यात आली आहे.
राजपूत नियुक्तीच्या प्रतीक्षेत होते. शेख यांनी सुरुवातीच्या काळात प्राथमिक शिक्षक म्हणून काम केले. महाराष्ट्र राज्य लोकसेवा आयोगाच्या परीक्षेद्वारे शेख यांची प्रथम विक्रीकर कर निरीक्षक पदी निवड झाली होती. पुढे त्यांची राज्य सेवेत तहसीलदार म्हणून निवड झाली.
वाशीम व यवतमाळ जिल्ह्यात प्रशिक्षणार्थी तहसीलदार म्हणून काम केल्यावर शेख नगर येथे कुळकायदा शाखा आणि त्यानंतर राहुरी तहसीलदार म्हणून कार्यरत होते. आता शेख पुढील नियुक्तीच्या प्रतीक्षेत आहेत. संगमनेर तहसीलदार अमोल निकम यांची बदली नाशिक जिल्हाधिकारी कार्यालय येथे तहसीलदार पदी झाली आहे. संगमनेर तहसीलदार पदी नवनियुक्‍तीची प्रतीक्षा आहे.
