शहर बँकेच्या बाेगस कर्जप्रकरणात योगेश मालपाणीला अटक
अहमदनगर शहर बँकेच्या बाेगस कर्जप्रकरणात आणखी एकाला अटक करण्यात आली आहे. याेगेश मालपाणी असे त्याचे नाव अाहे. अार्थिक गुन्हे शाखेने ही कारवाई केली. मालपाणी याला सकाळी साडेनऊ वाजता चाैकशीसाठी ताब्यात घेण्यात अाले. त्यानंतर त्याला दुपारी बारा वाजताच्या दरम्यान अटक करण्यात आली.
डाॅ. नीलेश शेळके संचलित एम्स हाॅस्पिटलमधील मशिनरी खरेदीसाठी अहमदनगर शहर सहकारी बँकेने १७ कोटी २५ लाख रुपयांचे बोगस कर्ज वाटप केल्याने डॉ. शेळके याच्यासह बँकेचे संचालक मंडळ अशा २५ जणांविरुद्ध फसवणुकीचे तीन गुन्हे कोतवाली पोलिस ठाण्यात दाखल आहेत.
या मशिनरींचा पुरवठा याेगेश मालपाणी याच्यामार्फत झाला असल्याचे तपासात पुढे अाले अाहे. डॉ. शेळके यांच्याविराेधात दाखल तीन गुन्ह्यांमध्ये स्वतंत्र दोषारोपपत्र जूनच्या पहिल्या तारखेला न्यायालयात दाखल करण्यात अाले अाहे.
राहुरी येथील डॉ. रोहिणी भास्कर सिनारे, श्रीरामपूर येथील डॉ. उज्ज्वला रवींद्र कवडे, नगरमधील डॉ. विनोद अण्णासाहेब श्रीखंडे या तिघांनी याप्रकरणी फिर्याद दिली आहे.
बनावट कागदपत्रांद्वारे या तिघांची प्रत्येकी ५ कोटी ७५ लाख रुपयांची फसवणूक झाल्याचे फिर्यादीत म्हटले. याेगेश मालपाणी हा डॉ. शेळकेच्या एम्स हाॅस्पिटलच्या मशिनरीचा पुरवठादार हाेता. हॉस्पिटलमध्ये भागीदार असल्याने या तीनही डॉक्टरांची बनावट कागदपत्रे, बनावट सह्या करून शहर सहकारी बँकेकडून प्रत्येक डॉक्टरच्या नावावर परस्पर बोगस कर्ज मंजूर करून घेण्यात आले.
बँकेचे संचालक मंडळ, तसेच नीलेश शेळके, मशिनरी डिलर्स योगेश मालपाणी, स्पंदन मेडिकेअर व आर. टी. कराचीवाला यांनी संगमत करून ही फसवणूक केला असल्याचे फिर्यादीत म्हटलेले अाहे.
